-ó hvílíkt frelsi-

Nú styttist óðum í heimför, þ.e. til Lundúna og maður ætlar víst aldrei að losa um þessar rætur sem maður hefur á Íslandi. Sem betur fer. Enda er hér besta fólkið, besta loftið og vatnið. Nú þegar ég hef slakað á og reynt að borða eitthvað annað en hangikjöt og sykraðar kartöflur er ég full orku fyrir nýja árið og ætla mér að nýta það í eitthvað magnað. Tónlistin er númer 1, 2 og 3 þetta árið sem og önnur ár. Ég sé fram á mikla vinnu en ennþá meiri gleði.

Skellti inn myndum sem Krullinn tók 18.des þegar kátína var á Rex og Ralph kom loks á Klakann og fékk að kynnast næturlífinu og restinni af fjölskyldunni og Bergmanninn var dreginn út á lífið og inn á Rex hvar hann missti allan jaðarskap úr blóðinu en hefur jú endurheimt jaðarinn síðan þá. Myndir!

Á morgun munu verða ágætis endurfundir hjá þremur skvísum sem enduðu menntaskólaárin sín saman í 6-L og hlakka ég mikið til að sjá þær stöllur, Evu og Berglindi enda hefur sambandið allverulega slitnað. Ég hef þó löglega afsökun því ég er útlendingur.

Svo hlakka ég mikið til laugardagsins en þá mun ég nýta mér eina af jólagjöfunum mínum og skella mér á Nordica Spa í 50 mínútna heilnudd, smábað og allt sem tilheyrir. Svo ætlar sá góði maður er gaf mér þessa gjöf að skella sér með mér í slíkt hið sama. Svo er búið að plana keiluferð, út að borða og allt slíkt er hressir og kætir.

Á nýársdag sat fjölskyldan við hringborðsumræður og fór yfir árið sem var liðið og áætlanir hvers og eins fyrir árið. Þá voru ýmsir gullmolar dregnir upp úr "Viska fyrir okkar öld" bókinni og hver og einn fékk sína setningu fyrir árið. Þarna flugu háfleyg orð og fengu mann virkilega til að nota heilasellurnar í takt við hjartað.

Ég fékk þessi góðu orð fyrir árið 2005:

Meistari tekur alltaf eina lotu enn.

og

Sá einn tapar í raun sem hættir að reyna!

..og nú er ég full af eldmóð og bjartsýni og ég mun alltaf taka eina lotu enn!

V