-Róm í lamasessi en lífið heldur áfram-

Það hefur margt á mína daga drifið að venju. Ferð mín til Belgíu var frábær og vorum við Bergmanninn dugleg að ferðast um og upplifa nýja hluti. Myndirnar segja nú meira en mörg orð og því læt ég þar við sitja en nefni þó að ferð okkar til Indriða og Jóhönnu var yndisleg og þökkum við kærlega fyrir okkur. Þau skötuhjú búin að koma sér vel fyrir í Hasselt sem er rétt fyrir utan Genk bæinn þar sem þessi ljúflingsdrengur spilar fussball. Okkur var boðið á stórleikinn Anderlecht-Genk á þessum líka risastóra leikvelli og var það sérlega skemmtileg upplifun þar sem ég hef ekki verið dugleg að sækja leikina hér í stórborginni, Lundúnum.

Svo kom ég til baka fyrir helgi og við tók heljarinnar verkefnavinna í skólanum þar sem við erum að klára síðustu mixin okkar fyrir þennan kúrs. Ég tók mér þó litla pásu fyrir heimsókn foreldra minna sem dvöldu hjá okkur í tvær nætur. Hef ekki séð settið í þrjá mánuði tæpa og því afskaplega gott að rifja upp krúttheitin í þeim.

The Rainmaker platan er nú tilbúin, fullkláruð og masteruð og er það mjög spennandi þar sem ég á tvö lög á henni með Fayney og syng þau einnig. Útgáfa á henni er á næsta leiti og tvennir stórir tónleikar verða haldnir hér í stórborginni. Ég mun láta vita hvenær þetta fer allt fram svo fólk geti fjölmennt í helgarferð! Enn fremur er lagið góða "Marathon" að fara að kíkja í plötuverslanir og þegar komið á einhverja klúbba í borginni. Svo bíður maður bara eftir að sjá auglýsinguna á BBC og stefgjöldin fara að rúlla inn máske!!!

Nú er bara að bretta upp ermar og taka á honum stóra sínum. Ótalmargt framundan og þýðir ekkert hangs.

Bið ykkur vel að lifa.. þangað til næst (",)

V